Gazawar Isra'ila a Kwamitin Sulhu kan neman goyon baya kan kisan kiyashin da take yi a Gaza
Kamfanin dillancin labaran iqna ya habarta cewa, ya nakalto daga shafin sadarwa na yanar gizo na Aljazeera cewa, a daren jiya ne Isra’ila ta ci gaba da kai hare-hare a yankuna daban-daban na zirin Gaza. Ma'aikatar lafiya ta Falasdinu ta sanar da cewa adadin shahidan ya karu zuwa mutane 436 da suka hada da kananan yara 78, yayin da kimanin mutane 2,300 da suka hada da yara sama da 120 suka jikkata.
A gefe guda kuma kakakin sojojin yahudawan sahyoniya ya bayyana cewa: Sojojin na ci gaba da kai munanan hare-hare a zirin Gaza tare da yin mummunar barna kan karfin kungiyar Hamas.
Abu Hamzah, kakakin rundunar Quds Brigades, reshen soja na kungiyar Jihad Islami, ya kuma yi kira ga Palasdinawa a duk inda suke, musamman ma a yammacin gabar kogin Jordan, da su shiga aikin guguwar Al-Aqsa, da kuma nuna hadin kan bangaren gwagwarmaya.
Gazawar Isra'ila a taron kwamitin sulhu
A jiya ne aka gudanar da taron gaggawa na komitin sulhu dangane da ci gaban da aka samu a harin guguwar Al-Aqsa. Kafin taron dai Amurka ta yi kira ga daukacin mambobin kwamitin sulhun da su yi Allah wadai da harin da Hamas ke kai wa Isra'ila. To sai dai kuma wannan bukata ta Amurka ta ci tura kuma ba a cimma matsaya ba na yin Allah wadai da Hamas.
Abu Obeidah, kakakin bataliyar al-Qassam ya bayyana cewa, mayakan na ci gaba da gwabzawa a yankuna da dama tare da dakarun mamaya na Isra'ila, kuma sun samu damar isa yankunan da ke kusa da Ashkelon. Abu Obeidah ya kuma sanar da cewa, 'yan adawa sun yi nasarar kame wani sabon rukunin fursunonin Isra'ila tare da shiga yankin Zirin Gaza.
